'ரி' --அ.முத்துலிங்கம்

 

சிறுவாணி வாசகர் மையத்தின்  'மாதம் ஒரு நூல்' திட்டத்தில் பெருமைமிகு

அடுத்த வெளியீடு...

                                                                            'ரி'

                                                            அ.முத்துலிங்கம்

                                                    (தேர்ந்தெடுத்த சிறுகதைகள்)

தயாரிப்பில்....

அ.முத்துலிங்கத்தின் புனைகதை வெளிப்பாடு மனித இயல்பின் பல்வேறு ஆர்வங்களையும் தாபங்களையும் குதூகலங்களையும் சோகங்களையும் வெகு நுட்பமான வகையில் தூண்டிவிடக்கூடியது.

அவருடைய உலகத்தில் இயற்கைக்கு நிறைய இடமிருக்கிறது.

நிகழ்ச்சிகளை விவரிக்கையில் அவர் மிகையுணர்ச்சியையும் பச்சாத்தாபத்தையும் வெகு இயல்பாகத் தவிர்த்து  விடுகிறார்.

இன்னொரு குறிப்பிடத்தக்க அம்சமான அவருடைய நகைச்சுவையுணர்வு நிறைய உள்ள  படைப்புகளில்தான், ஆழ்ந்த சோகமும் உள்ளது.

புனைகதையில் இன்று சாத்தியமான நவீனத்துவம் அனைத்தும் உள்ளடங்கிய அதேநேரத்தில் அ.முத்துலிங்கத்தின் கதைகள் வாசகர்களில் பெரும்பான்மையோருக்கு எளிதில் எட்டக் கூடியதாகவும் அமைந்திருக்கின்றன. 

*அசோகமித்திரன்

பழைய கணக்கு - சாவி

 

                                                                பழைய கணக்கு

                                                                            சாவி

                                                                    கட்டுரைகள்

----------

" ஒரு எழுத்தாளன் ஆரம்ப காலத்திலேயே சமூகத்தைப் பற்றி எழுத ஆரம்பித்தால் பிரபலமடையாமல் போய்விடுவான். நன்றாக வளர்ந்துவிட்ட பிறகு சமூகத்துக்கு ஏற்ற எழுத்துக்களை எழுதுவதுதான் அவனுக்கு நல்லது. அவசியமும் கூட... தனி மனிதனின் உணர்ச்சிகளும், தன் அறிவை வெளிப் படுத்துவதும் மட்டுமே ஒரு எழுத்தாளனின் கதைகளில் இருந்தால் அது தவறு என்கிறேன். இயல்பாகக் கதை ஓட்டத்தோடு அவைகள் வெளிப்பட்டால் நன்றாக இருக்கும்.

 உதாரணம் சொல்ல வேண்டுமென்றால் ரவா லட்டுக்கு உள்ளே இருக்கும் முந்திரிப் பருப்பைப்போல் அவைகள் இருக்க வேண்டுமே தவிர கண்ணாடி ஷோ கேஸில் ரவா 

லட்டின் மேலே குத்தி வைக்கப் பட்டிருக்கும் முந்திரிப் பருப்பைப் போல இருக்கக் கூடாது. 'தான்' என்ற அகம்பாவும் எழுத்தில் கூடாது..."

- சாவி 

--------------

கதவைத் திறக்கும் வெளிச்சம் - மாலன்

 

                                                        கதவைத் திறக்கும் வெளிச்சம்  

                                                                                மாலன்

                                                            தேர்ந்தெடுத்த சிறுகதைகள்

உலகெங்கும் பரவிக் கிடப்பவை வசீகரமான அரசியல் பொய்களும், வசதியற்ற ஏழைகளும்

                                                                        - அந்தரத்தில் கண்ணாடி துடைப்பவர் 

சூடிக்கொள்ளப்படும் கிரீடம் எல்லாம் யாரோ எவரையோ வருத்திப் பெற்றவைதான்

                                                                        - அம்மாவின்  கிரீடம்

நமது அரசியல், உணர்ச்சிகள் சார்ந்தது. சட்டம், அறிவு சார்ந்தது. ஒரு சமூகத்தை வழிநடத்த வேண்டியது உணர்ச்சிகளா? அறிவா?

                                                                                                        - அறம்

ஆயுதம்னா கத்தி கபடாவா ? காகிதம்னா வழவழவென்று வெள்ளைக் காகிதமா ?  பாரதி சொல்லுக்கு, எழுதுவது நம் ஆயுதம். (Writing is our weapon)  என்றல்லவா அர்த்தம் ?  

                                                                                                        - ஆயுதம்

புரட்சிக்காரர்களின் வீடுகளிலும்  அடிமைகள்  சிறைப்பட்டிருக்கிறார்கள். அநேகமாகப் பெண்களாக.

                                                                                                        - எங்கள் வாழ்வும் 

பிடித்த  புத்தகம் பிடித்த பெண்ணைப் போல மறுபடி மறுபடி அழைக்கும். விடுமுறைப்  பிற்பகலில்,  நள்ளிரவில்  புரட்டக்  கூப்பிடும்..அதைத் தேடிப் புறப்பட்டவன் கையில் கவிதை சிக்கும். தத்துவம் பிடிபடும். வாழ்க்கைப்  பந்தைப்  பிரித்து  வீசிய  கேள்விகள்  இடறும். பதிலும், திகிலும் எதிர்ப்படும்.

                                                                                                        - யோசனை

"நாம் மாறியிருக்கிறோம்.ஆனால் வளர்ந்திருக்கிறோமா?"

                                                                                            - புதுமைப்பித்தனின் எக்ஸ்ரே

------------------------------

இந்தத் தொகுப்பை குறித்து இங்கே நான் சொல்லியிருப்பது முழுக்க முழுக்க நான் உணர்ந்தது.

விமர்சனம் என்பது நுணுக்கங்கள் தெரிந்தவர்களுக்கானது. எனக்கு நுணக்கங்கள் தெரியாது. ஆகவே விமர்சிப்பது எனக்கு வராது. நான் சராசரி வாசகன். அவ்வளவே!

வார்த்தைகளுக்கு அதிக கனம் கொடுக்காமல் இயல்பாக எளிமையாக வாசிப்பை உணர வைக்க ஒரு சிலரால் மட்டுமே முடிகிறது. அறிவுஜீவித்தனமாக நினைத்தக்கொண்டோ முற்போக்குத்தனம் என நினைத்துக்கொண்டோ எதையாவது கிறுக்கிப்போட்டு இதைப் படித்தே ஆகவேண்டும் என்கிற அழுத்தத்தைக் கொடுப்பவர்களின் மத்தியில் மாலனின் எழுத்து நளினம்.

இந்த நளினம்தான் கதைப்போக்கை ரசிக்க வைக்கிறது. இலகுவாக நம்மை கதையின் நிழ்வுகளோடு தொடர்புபடுத்திக் கொள்ள முடிகிறது. கதை நிகழ்வுகள் நம் வாழ்க்கையின் சில பக்கங்களை பிரதி எடுத்தது போலவும் உணரமுடிகிறது.   

விட்டேத்தியாக கதைகளை முடிப்பது போலிருக்கிறது. இது யுக்தியா இல்லை வாசககனை யூகிக்க வைக்கும் முயற்சியா ? இல்லை இது ஒரு பாணியா ? சராசரி வாசகனுக்கு எப்படி கதை துவங்கவேண்டும் அது எப்படி முடியவேண்டும் என்ற எதிர்பார்ப்பு இருக்கிறது. அது ஆளாளுக்கு மாறுபடும். முடிவு புரியாத சில கதைகளை புரிந்து கொள்ள இனிமேலாவது நான் முயற்சிக்க வேண்டும்.

ஒரு சில கதாபாத்திரங்களின் பெயர் திரும்பத்திரும்ப சில கதைகளில் வருவது ஏன் எனத் தெரியவில்லை

அனந்த் (அனந்தராமன்) தமிழ் முருகேசன்,  பாலி மற்றும் அருணா  இவர்கள் வெவ்வேறு கதைகளில் வருகிறார்கள். வேறு வேறு சூழல்கள். ஒன்று அந்தக் கதாபாத்திரங்கள் நிஜவாழ்வில் அதே பெயருடன் மாலனுடன் வழிநெடுக வந்திருக்கலாம் அல்லது கதை எழுதுகிறவர்களுக்கு ஒரு குறிப்பிட்ட பெயர் மனதில் ஒட்டிக் கொண்டுவிடும் போலிருக்கிறது.

அந்தரத்தில் கண்ணாடி துடைப்பவர்,  அம்மாவின் கிரீடம் அறம் ,செப்டம்பர் 11,1952 

புலிவேட்டை,

இச்சிறுகதைகள் அவ்வளவாக தாக்கம் ஏற்படுத்தவில்லை. எங்கேயோ நடந்த ஒன்றை ஆர்வமில்லாமல் கேட்போமே அந்த மாதிரிதான் இருக்கிறது.

ஆயுதம்

சுவராஸ்யம். கதைத் தளம் 'சிவப்பு சித்தாந்த அரசியல் நெடி. கதைக் காலம் பழையது. ஆனாலும் இப்போதும் எப்போதும் பொருந்தி வரும் நிகழ்வுகள். மீண்டும் ஒரு முறை வாசிக்க வைக்கும் கரு. இயல்பான நடை.

இதெல்லாம் யாருடைய தப்பு

கமர்ஷியலான சமூகத்தில் ஒரு விஷயத்திற்கு யுடிலிட்டி இருந்தால்தான் மதிப்பு. மொழிக்கும் அப்படியே.  வாசிக்கும்போது

தமிழை வைத்து அரசியல் நடத்தி ஏமாற்றும் கட்சி மட்டுமல்ல,  என் கல்லூரி காலத் தோழனும் ஞாபகத்தில் வந்து போனான்

இளஞ்செழியன் ஆரம்பித்த மெஸ்

மிக எதார்த்தமான  கதை.  என் வாழ்க்கையோடு ஒரு கனெக்ட் இருப்பதாக உணர்ந்ததால் என்னவோ கதை பிடித்தது.

இளஞ்செழியனின் மூர்க்கத்தனத்தோடு இளம் வயதில் இருந்த என்னைப் போன்ற பலரை காலமும் நிதர்சனமும்  மாற்றாமல் விடுவதில்லை. கொள்கை, புரட்சி சித்தாந்தகள் எல்லாம் ஏட்டுச் சுரைக்காய்கள். 'புத்திசாலித்தனமாக இருப்பது  மட்டுமல்ல வெற்றிகரமாக இருப்பதுதான் வாழக்கை.'

இறகுகளும் பாறைகளும்

அருணாதான் கதையின் சென்டர் பாயின்ட். அதனால் பத்மா விஷயம் அந்தரத்தில் விடப்பட்டு அருணா கதையை ஆக்ரமிக்கிறார்.  

அருணாவைப் போல கவிதா என்கிற பெண்ணை என் நாற்பதுகளில் கடந்து வந்திருக்கிறேன்.

எங்கள் வாழ்வும்

கொள்கை புரட்சி சித்தாந்தம் இவையெல்லாம் தன் வாழ்வு  என்று வரும்போது அடகு வைக்கப்படுகிற எதார்தத்தை சொல்கிற கதை.  கண்கூடாக பல அரசியல்வாதிகள் ஞாபகம் வந்து போகிறார்கள்.நல்ல கதை. சிலருக்குப் பிடிக்காது. அந்தக் காலத்தில் விமர்சனஙகளுக்கு உள்ளாகியிருக்க வேண்டும்.

' புரட்சிக்காரர்கள் வீடுகளிலும் அடிமைகள் அடிமைகள் சிறைபட்டிருக்கிறார்கள். அநேகமாக பெண்களாக' நல்ல டேக் லைன்.

கதவைத் திறக்கும் வெளிச்சம்

க்ளாஸ். வாசித்து முடித்ததும் என்னவென்று சொல்வது எனத் தெரியாத உணர்வு.

'வாழ்க்கைக்கு என்ன அர்த்தம் ? காசா? பதவியா? புகழா? அனுபவித்துத் தீர்க்கிற உல்லாசமா? சாவா? என்ன அர்த்தம்.'

என் இருபதுகளின் நான் கேட்டுக்கொண்ட அதே கேள்விகள். . 'யுனிவர்சல் லவ் அதோட நிறம்தான் காவி'. எக்ஸெலன்ட் மாலன்.

கல்யாணம் என்றொரு ரசாயனம்

இதே தொகுப்பில் ஏற்கனவே வாசித்த சில கதைகளின் சாயல். கதைக்கருக்கள் ஏறத்தாழ ஒன்று. கதாபாத்திரங்கள் மற்றும் அவர்கள் கொண்டிருந்த கோட்பாடுகள் இவைகள்தான் வித்யாசம்

(எங்கள் வாழ்வும், இளஞ்செழியன் ஆரம்பித்த மெஸ், இதெல்லாம் யாருடைய தப்பு)

கல்லிற்கும் கீழே பூக்கள்

சுமைகளற்ற வாழ்க்கை வாழ்க்கையே இல்லை. குறைகளைப் பெரிதாக நினைக்காமல் மிஞ்சியிருக்கிற வாழ்க்கையை மெருகு போட்டு பார்த்து சந்தோஷிக்க எல்லாராலும் முடிவதில்லை. கொஞ்சம் ஆழ்ந்து வாசித்தால்தான் புரிகிறது கதை.

களவு

இந்தத் தொகுப்பில் எனக்கு மிகவும் பிடித்த மூன்றாவது கதை. ஒரு கோபத்தில் திருடர்களோடு வாழவேண்டிய நிர்பந்த்தைக் கோபித்துக்கொண்டாலும் குடை விஷயத்தால் உறுத்துதலுக்கு உள்ளான அவன் மனதில் நிற்கிறான்.

காணமல் போனவர்கள்

நட்பு/ ஸ்நேகிதம் இதெல்லாம் ஒரு எல்லைக்குட்பட்டது. என்னதான் நட்பென்றாலும்  கால நதி இழுக்கும் இழுப்பில்  எங்கேயோ போய் கரை சேர்கிறோம்.  அதுதான் வாழ்க்கை.

யார் எங்கிருக்கிறோம் என்று தெரியாமல் போய்விடுகிற நட்புகளையும் இணைத்தே தான் நாமும்  கடந்துவருகிறோம் வாழ்வை. நல்ல கதை.

குழலி

வாசித்து முடித்ததும் திருப்திபடவில்லை. ஏதோ ஒன்று குறை போலப்பட்டது. ஒரு வேளை அதுதான் இந்தக் கதையின் வெற்றியா எனத்தெரியவில்லை.

கூலி

ஒரு தொழிலாளியின் பணத்திற்கான தேவை ஒரு புறம் ரெட் டேபிஸம் என்று சொல்வதா எனத் தெரியவில்லை. ஏறத்தாழ அது மாதிரியான அதிகாரித்துவ சிக்கலகள் மறுபுறம். வித்யாசமான கோணம். பிடித்துப்போன நான்காவது சிறுகதை.

சந்தான லட்சுமி

முடிவை யூகிக்க முடிந்தது. சினிமா பாணியிலான முடிவு. ஆனால்  கதை முழுவதும் மாலன் எழுத்தில் அப்படி ஒரு நளினம்.  பிடித்த வகையறாவில் ஐந்தாவது கதை.

தப்புக்கணக்கு.

குழந்தையின் தப்புக் கணக்கைவிட, அதன் உலகைப் புரிந்துகொள்ளத்

தவறும் பெரியவர்களின் கணக்கே 

இங்கு கவனத்திற்குரியது. ஆணாதிக்க சிந்தனை என்று யாரும் வராமல் இருக்கட்டும்.

புதுமைப்பித்தன் எக்ஸ்ரே

நல்ல வளமையான கற்பனை. புதுமைப்பித்தன் கதையில் வந்து போகிறார். நம் ' அனந்தராமன்' மூன்றாவது முறையோ நான்காவது முறையோ தெரியாது இந்தக் கதையிலும் வருகிறார். செய்திகள் இடைவிடாது பொழிந்து கொண்டிருக்கின்றன. ஆனால் சிந்தனையில் தாக்கங்களை ஏற்படுத்தியிருப்பதாகத் தெரியவில்லை. புதுமைப்பித்தனின் இந்த  உரையாடலுக்கு நம்மிடம் எப்போதும் பதில் இருக்கப்போவதில்லை. இந்தத் தொகுப்பில் கவர்ந்த ஆறாவது கதை.

மா, யோசனை வடு வித்வான் இக்கதைகளை இரண்டாம் வாசிப்பின் போது வாசிப்பதற்காக மீதம் வைத்துள்ளேன்.

மொத்தத்தில் மாலனோடு இந்தத் தொகுப்பில் பயணித்தது சுக அனுபவம்.

நன்றி Madhusudhan Sukumaran sir

https://www.facebook.com/share/1QCLGJjz98/

---------------------------------

'வாசகர் வட்டம்' லஷ்மி கிருஷ்ண மூர்த்தி படைப்புகள்

                          

 'வாசகர் வட்டம்'
                                        லஷ்மி கிருஷ்ண மூர்த்தி படைப்புகள்

“இருபத்தஞ்சி ரூபா அந்தக் காலத்துல பெரிய பணம்தான். கிட்டத்தட்ட ஒரு கிராம் தங்கத்துடைய விலைன்னு சொல்லலாம். ஆனா, நாம எல்லாரையும் பணம் குடுங்கன்னு கேக்கலையே? இலக்கியத்தைப் படிக்கணும், இலக்கியத்தை வளர்க்கணும், இலக்கியத்தை வாழ வைக்கணும்ங்கற எண்ணம் கொண்டவங்களைத்தானே கேட்டோம். தினசரி வாழ்க்கையில அது ஒருவகையில தியாகம்தான். இல்லைன்னு சொல்லலை. ஆனா, தியாகம் இல்லாம உலகத்துல எதையுமே செய்யமுடியாது, இல்லையா?”... ... ...

அவர் என்னிடம் பேசுகிறாரா, என்னை முன்வைத்து உலகத்திடம் பேசுகிறாரா என்பதை என்னால் புரிந்துகொள்ள முடியவில்லை. 

ஓர் இலட்சியப் பெண்மணியைச் சந்தித்து உரையாடும் வாய்ப்பு தற்செயலாக எனக்குக் கைகூடி வந்ததும் இயற்கை நல்கிய பெரும்பேறு என்ற எண்ணமும் கூடவே எழுந்தது.

- பாவண்ணன்

---------------------------------

அத்தையின் (லஷ்மி கிருஷ்ண மூர்த்தி) படைப்புகள் கிடைக்கப் பெற்றேன்.

1.தத்ரூபமாக வரையப்பட்ட அத்தையின் அன்பு முகம்.

நலம் விசாரித்துப்புன்னகைக்கும்   பாசமான பார்வை....உயிரோவியமாய் வரைந்த ஓவியர் ஜீவாவிற்கு என் மனமார்ந்த பாராட்டுகள்.

உங்கள் பாராட்டுகளும்,நல்வாழ்த்துகளும்....

என் புத்தக அலமாரிக்கு மேலும் ஒரு பொக்கிஷம் கிடைக்கச்செய்த சிறுவாணி வாசகர் மையம் மற்றும் பவித்ரா பதிப்பகத்திற்கு என் அன்பான நன்றிகள் 🙏🏻

கிட்டத்தட்ட நூறு வருடம். கடந்த காலத்தைய தற்போதைய தலைமுறை‌ ஏறத்தாழ மறந்து போன மனிதர்களின் படைப்புகளை அச்சில் கொணர்ந்து வாழ்வின் தரத்தை மேம்படுத்தும் இவ்வகைப் பதிப்புகள் மிகவும் போற்றத்தக்கது.🙏🏻

Comments from my cousin

.............

(Message from Thiru Srinivasa murthy s/o Lakshmi krishnamurthy)

நாஞ்சில்நாடன் விருது-2026 காணொளிகள்

 

"இந்திய கணினிக் கல்வியின் தந்தை" என்று போற்றப்படுபவர், இந்தியாவின் மிகவும் மதிக்கத்தக்க கல்வியாளர்களுள் ஒருவருமான

பேராசிரியர் ஈ.பாலகுருசாமி அவர்களின் விருதுரை 

https://youtu.be/NLJaOsvDZrE

 C4TN, Lead India  அமைப்புகளின் மூலம்  பல்வேறு சமூகப் பணிகளாற்றிவரும் திரு C.G.S மணியன் அவர்களின் வாழ்த்துரை

https://www.youtube.com/watch?v=njRqxXSzgOc

சொல்வனம் இணைய இதழின் ஆசிரியர் குழுவில் ஒருவர்.

சிறுவாணி வாசகர் மையத்தின் கௌரவ ஆலோசகர் திரு.வ.ஸ்ரீநிவாசன் அவர்களின் வாழ்த்துரை.

https://www.youtube.com/watch?v=Nbn6g9id7Ug

50 வருடங்களுக்கும்  மேலாக உயர் தரத்தில் எழுதிக் கொண்டிருக்கும்,

சிறுவாணி வாசகர் மையத்தைத் தொடங்கி வைத்து தொடர்ந்து எங்களை வழிநடத்திக் கொண்டிருக்கும் திரு. நாஞ்சில் நாடன் அவர்களின் தலைமை உரை   

https://www.youtube.com/watch?v=cAHGOth3MxQ

 கோவையின் பெருமைமிகு ஓவியர், கலைமாமணி ஜீவா அவர்களின் விருது அறிமுக உரை

.... .... .... .... ....

 இவ்வருட நாஞ்சில் நாடன் விருதாளர்  இரா.மணிகண்டன்  ஏற்புரை....

https://www.youtube.com/watch?v=BKTfvvAuKx0

நன்றி: Shruti Ilakkiyam 

#நாஞ்சில்நாடன்விருதுவிழா  

2026

நாஞ்சில்நாடன் விருது விழா -2026

சிறுவாணி வாசகர் மையம் வழங்கும் நாஞ்சில்நாடன் விருது-2026 க்கு திரு.இரா.மணிகண்டன் (கோவை குளங்கள் பாதுகாப்பு அமைப்பு)  தேர்வு செய்யப்பட்டுள்ளார்.

விழா நாள்: ஆகஸ்ட் 09 மாலை 5.30 முதல்...

இடம்: ஆர்த்ரா ஹால்  அண்ணாசிலை அருகில், அவிநாசி சாலை, கோவை

----------

கோவையில் சிறுவாணி வாசகர் மையம் 2017 உலகப் புத்தக தினம் அன்று துவக்கப்பட்டது. வாசிப்புப் பழக்கத்தை ஊக்குவிக்கவும் ,சிறந்த எழுத்தாளர்களின் எழுத்துக்களை இன்றைய தலைமுறைக்குக் கொண்டு செல்லும் பணியையும் இந்த மையம் செய்து வருகிறது .

இந்த அமைப்பின் மூலம் "மாதம் ஒரு நூல்" எனச் சிறந்த படைப்புகள் உறுப்பினர்களுக்கு  அனுப்பி வைக்கப்படுகிறது. இதன் தலைவராக தி சுபாஷிணி, ஒருங்கிணைப்பாளராக ஜி. ஆர். பிரகாஷ் ஆகியோர் உள்ளனர்.

கௌரவ ஆலோசகர்களாக திரு.நாஞ்சில்நாடன், திரு.வ.ஸ்ரீநிவாசன், திரு.ஆர்.ரவீந்திரன் (RAAC)ஆகியோர் வழிநடத்துகின்றனர். ஓவியர் ஜீவா புத்தகங்களுக்கான அட்டைப்படங்களை வடிவமைத்துத் தருகிறார்.

 

கடந்த ஒன்பது ஆண்டுகளில் தமிழகம் மற்றும் மற்ற மாநிலங்களிலிருந்தும் 500+ உறுப்பினர்கள் உள்ளனர்.

 

எழுத்தாளர் நாஞ்சில்நாடன் பெயரில் வழங்கும் விருது பற்றி சிறு அறிமுகம் ;

 

கலை, இலக்கியம்  சமூகம் ஆகிய துறைகளில் நேர்மையாகவும் துணிச்சலாகவும் தொடர்ந்து செயல்படுபவர்களுக்கு வழங்கப்படும் இந்த விருது பரிசுத் தொகை ரூபாய் 50,000/- ,கேடயம் மற்றும் சான்றிதழ் அடங்கியது .இவ்விருதை நிறுவியவர் திரு.வி.கிருஷ்ணகுமார் அவர்கள்.

 

முந்தைய ஆண்டுகளில் விருது பெற்றவர்கள்;

ஓவியர் ஜீவா (2018),

முனைவர் ப. சரவணன் ( 2019) ,

பத்திரிகையாளர்,எழுத்தாளர் கா.சு.வேலாயுதன் (2020),

மணல்வீடு திரு.ஹரிகிருஷ்ணன்(2021)

சமூகச் செயற்பாட்டாளர் 'கௌசிகா' திரு. செல்வராஜ்(2022)

மொழிபெயர்ப்பாளர் திரு.அருட்செல்வப் பேரரசன்(2023)

கவிஞர் இசை(2024)

எழுத்தாளர் வேலாயுத முத்துக்குமார் (2025)

------------------

விருதாளர் திரு.இரா.மணிகண்டன்

 

நொய்யல் ஆறு, அதைச் சார்ந்த நீர்நிலைகளைப் பாதுகாப்பது, கோயம்புத்தூர் நகரத்தில் மக்களுக்கும் நீர்நிலைகளுக்கும் இடையிலான தொடர்பை மேம்படுத்துவது, பசுமைப் பரப்பளவை அதிகரிப்பது, பல்லுயிர்ச்சூழலைப் பெருக்குவது, பொதுமக்களுக்கு சுற்றுச்சூழல் விழிப்புணர்வை மேம்படுத்துவது எனும் நோக்கங்களோடு 2017 முதல் திரு.இரா.மணிகண்டன் தலைமையில் கோவை குளங்கள் பாதுகாப்பு அமைப்பு செயல்பட்டுவருகிறது.

.இவ்வமைப்பின் தன்னார்வலர்கள் வாரம்தோறும் ஏரிகள், குளங்கள், குட்டைகள்,தடுப்பணைகள் போன்ற நீர்நிலைகளைப் பாதுகாக்கத் தூர்வாருதல், நெகிழிக் குப்பைகளை அகற்றுதல் போன்ற தூய்மைப் பணிகளைச் செய்துவருகிறார்கள்.இவர்களின் செயல்பாடுகளால் கோவையைச் சுற்றியுள்ள நீர்நிலைகள் தற்போது நீர்நிறைந்து காணப்படுகின்றன.

பசுமைப் பரப்பளவை அதிகரிக்கும் விதமாக பல்லாயிரக்கணக்கான மரக்கன்றுகள் கோவையின் பல்வேறு இடங்களில் நடப்பட்டுள்ளன.

வெள்ளலூர் கிராமத்தில் வெள்ளலூர்க் குளம் பட்டாம்பூச்சி பூங்கா, 

காளப்பட்டியில் சங்க இலக்கியப் பூங்கா,

சீரபாளையத்தில் சமூகப் பூங்கா ஆகியவை இவரது எண்ணத்தில் உருவாகியுள்ளன.

திரு.இரா.மணிகண்டன் அவர்களின் சீரிய இச்சேவைகளுக்காக மத்திய,மாநில மற்றும் தனியார் அமைப்புகளால் கௌரவிக்கப்பட்டுள்ளார்.

 

சிறுவாணி வாசகர் மையம் நாஞ்சில்நாடன் விருது (2026), திரு.இரா. மணிகண்டன் அவர்களுக்கு  வழங்குவதில் பெருமகிழ்ச்சி அடைகிறது.

 

தொடர்புக்கு - ஜி.ஆர்.பிரகாஷ்  

               9940985920   , 8778924880

 

 

 

கோவை புத்தகத் திருவிழா (2026) ல் சிறுவாணி வாசகர் மையம்

 

கோவை புத்தகத் திருவிழா (2026) ல்

சிறுவாணி வாசகர் மையம். (Siruvani Vasagar maiyam)

https://www.facebook.com/share/p/1EHJPDBSZd/

அனைவருக்கும் வணக்கம்.

கோவை புத்தகத் திருவிழா ஜூலை 17 ம் தேதி துவங்கி நேற்றுடன் பத்துநாட்கள் இனிதே நிறைடைந்தது.

நமது சிறுவாணி வாசகர் மையம் அரங்கு 35 ல் பங்குபெற்றதையும் அறிவீர்கள்.

கோவை புத்தகத் திருவிழாவில் பங்குபெற

ஊக்குவித்த திரு.நாஞ்சில்நாடன்,

திரு.வ.ஸ்ரீநிவாசன் ,

திரு.ஆர்.ரவீந்திரன்....

பங்குபெற வாய்ப்பளித்த புத்தகத் திருவிழாவின் தலைவர்

திரு.ராஜேஷ்,திரு.விக்னேஷ்,திரு.முகுந்தன் ஆகியோருக்கும் மனமார்ந்த நன்றி.

🙏🙏🙏

வாழ்நாள் சாதனையாளர் விருதுபெற்ற பேராசிரியர் க.ரத்னம் ஐயா அவர்கள் சிறுவாணி அரங்குக்கு வருகைதந்து சிறப்பித்தார்.அவருக்கு வணக்கமும் நன்றியும்.

---------

சிறுவாணி  வாசகர் அரங்குக்கு வருகைதந்து பெருமைப்படுத்திய நண்பர்கள்/ எழுத்தாளர்கள்/உறுப்பினர்கள் ;

முடிந்தவரை பெயர்களை க் குறிப்பிட்டு நன்றிகூற முயல்கிறேன்.

பட்டியலில் விடுபட்டவர்கள் இருப்பின் அது எனது நினைவுக் குறைபாடே.

மன்னிக்கவும்.

-----------

திரு நாஞ்சில் நாடன், ஓவியர் ஜீவா, எழுத்தாளர்  எஸ். ராமகிருஷ்ணன், காலச்சுவடு பதிப்பாளர் திரு. கண்ணன்,எழுத்தாளர் பா.ராகவன்,எழுத்தாளர் சாருநிவேதிதா,திரு.மரபின் மைந்தன் முத்தையா,திரு.D.பாலசுந்தரம் ஐயா,

திரு.சுதேசமித்திரன், திரு.அரவிந்த் வடசேரி, மொழிபெயர்ப்பாளர் நிர்மால்யா, ஐயா பொதிய வெற்பன், திரு.கோணங்கி, திரு.முருகேச பாண்டியன், திரு.அய்யப்ப மாதவன்,

திரு.கா.சு.வேலாயுதன்,

'லயம்'திரு.காலசுப்பிரமணியன்,

புரவலர் 

திரு.V. கிருஷ்ணகுமார்,புரவலர் திரு.சத்தியமூர்த்தி....

புன்னகை அம்சப்ரியா,

காலச்சுவடு திரு அய்யாசாமி

திரு.CGS.மணியன்,ஓவியர்.சுந்தரம் முருகேசன் ....

கவிஞர் யவனிகா ஸ்ரீராம்,

சிவக்கவிமணி அவர்களின் பேரர்கள் திரு.சிவசுப்பிரமணியன்,திரு.கந்தசாமி,எழுத்தாளர் சு.வேணுகோபால்,

எழுத்தாளர்கள் திரு.லா.ச.ரா சப்தரிஷி,திரு.சங்கரராம பாரதி,

திரு.கே.என்.செந்தில்,திரு.ஸ்கந்தசுப்ரமணியன்,திரு.வேடியப்பன்(டிஸ்கவரி),

திரு.ஜீவகரிகாலன்(யாவரும்),

இயக்குநர் ராம்-ன் தந்தையார் திரு.சங்கரநாராயணன்,

திரு.நாகசந்திரன்,

திரு.இயகாகோ சுப்பிரமணியம்,திரு.போகன்சங்கர்...யூட்யூப் நண்பர்கள்...

திரு.கண்ணன் தண்டபாணி,

திரு.ஜான்சுந்தர், 

திரு.அவைநாயகன்,

திரு.மயன் மகேஸ்குமார்,திரு.மணிவண்ணன் சண்முகம்,லஷ்மிஹர்,

மற்றும் 

அனைவருக்கும் நன்றி.🙏

 

நியூஸிலாந்து நண்பர்கள் திரு.சாய்,திரு.பாண்டியராஜ் மற்றும் கனடா,ஆஸ்திரேலியா,அமெரிக்காவிலிருந்து வருகைதந்த நண்பர்கள்...

ஓய்வுபெற்ற காவல்துறை அதிகாரி திரு.பரமசிவன்,

எழுத்தாளர் சுரேஷ்வெங்கடாத்ரி தினமும் வந்திருந்து உதவிசெய்தார்கள் அவர்களுக்கும் பேராசிரியர்.விஜயராகவன், கவிஞர் கோவை சுபா ஆகியோருக்கும் நன்றி. 🙏🏻🙏🏻

பவித்ரா பதிப்பக நூல்களின் வெளியீட்டு விழாவில் கலந்துகொண்ட எழுத்தாளர்கள் ஜி.ஏ.பிரபா,திரு.ம.முருகன்,கவிஞர் ஜெயஸ்ரீ வெங்கடேசன் மற்றும் திரு வெங்கட்ராகவன் ஆகியோருக்கு நன்றி.

வரும் ஆகஸ்ட் 09 ல்

நாஞ்சில்நாடன் விருது -2026 நிகழ்வின் தலைமை விருந்தினர் திரு.பாலகுருசாமி (முன்னாள்) துணைவேந்தர் அவர்கள்,

விருதுபெறும் இரா.மணிகண்டன் (கோவை குளங்கள் பாதுகாப்பு அமைப்பு) அரங்குக்கு வருகைதந்தார்.அவருக்கு நன்றி.

புத்தகத் திருவிழாவிற்காக பணிநேரத்தை மாற்றிக் கொடுத்து உதவிய எங்கள் நிறுவன மேலாளர்...

மேலும் நமது சிறுவாணி வாசகர் மையத்திற்கு வருகைதந்த வாசகர்கள்,புதிதாக இணைந்துள்ள வாசகர்கள்,

எனது மகளுக்காகப் புத்தகங்களைத் தேடித்தேடி ,பரிந்துரை செய்து வாங்கித் தந்த பேராசிரியை.மாதங்கி,

இத்தனை நண்பர்களையும் எழுத்தாளர்களையும் சந்திக்கக் காரணமாயிருந்தது சிறுவாணி வாசகர் மையம் அமைப்பு.

இதனை உருவாக்கிய திரு.நாஞ்சில்நாடன்,

ஆடிட்டர் கிருஷ்ணகுமார்,மூத்த சகோதரியாக விளங்கும் தி.சுபாஷிணி மற்றும் ஆலோசகர்கள்,

பாரதி வண்ணப்படங்கள் 35000 என்கிற எண்ணிக்கையை இந்த புத்தகத் திருவிழாவில் நிறைவு செய்தது மகிழ்ச்சி.

மேலும் புத்தகத் திருவிழாவிற்கு வந்திருந்த 200 க்கும் மேற்பட்ட பள்ளி  மாணவர்களுக்கு வாசிப்பைப் பற்றி எடுத்துச்சொல்லி,

பல்வேறு நூல்களை அன்பளிப்பாக வழங்கியது மனதுக்கு நிறைவாக இருந்தது.

எனது குடும்பத்திலிருந்து அம்மா,மனைவி மற்றும் மகள்.

சிறுவாணியின்வாட்ஸ்அப் குழுக்களில் தொடர்ந்து ஊக்குவித்தவர்கள் ,

அனைவருக்கும் மனமார்ந்த நன்றி.

🙏🙏🙏🙏🙏🙏

தொடர்ந்து தங்கள் அன்பையும் ஆதரவையும் வேண்டுகிறேன்.

ஜி.ஆர்.பிரகாஷ்

ஒருங்கிணைப்பாளர்

சிறுவாணி வாசகர் மையம்

கோவை

-------------

 https://youtu.be/GUDaYT3enJo?si=1S6wCji9OFCM6rCS

 SVM from 4th minute

-----------------------

 https://youtu.be/Le9pDvQcv8Y?si=XtK6ErTFwnbM2wl9

 

4.51 minutes

----------------------

https://youtu.be/SjXMmzv8SKM?si=mdCMhkEczuABzB6I

Time: 26:40

----------------------

கோவைக்கு சுவை சேர்ப்பது 'சிறுவாணி நீர்'

அது நாவில்பட்டு தாகம் தீர்த்து உடலில் நிறையும்.

அது போன்றே 'சிறுவாணி வாசகர் மையம்' நூல்கள் கைககளில் தவழ்ந்து கண்களில் நுழைந்து இதயத்தை நிறைக்கின்றன.

 10ஆண்டில் வெற்றிகரமாக செயல்பட்டு வரும் இந்த வாசகர்மையம் நம் இன்றைய மிகப்பெரிய குறைகளான நேரமின்மை மற்றும் சிறந்த  நூல்களை எங்கு தேடிச்சென்று வாசிப்பது..என்பதை களைந்து  குறைந்த விலையில் பல நூல்களை நம் இல்லத்திற்கே தேடிவந்து மாதம் ஒரு நூல் என வருடத்திற்கு 12நூல்கள் நம் வாசிப்பிற்கு தருகிறார்கள். 6லிருந்து 100 வயதுவரை இதன் வாசகர்கள்.  100 வயதிற்கு மேல் உள்ளவர்கள் கூடஇதன் வாசகர்களாக (உறுப்பினர்களாக) இருக்கலாம். நான் அறிந்திட்டில்லேன். ஏனெனில் சிறந்த வாசிப்பு சுவாசிக்க வைக்கும். வாழ்வை ருசிக்க வைக்கும்.

இதன் தலைவராக திருமதி. மதிப்பிற்குரிய அம்மா சுபாஷிணி திருமலை அவர்கள் செயல்படுகிறார்கள்.

சிறந்த படைப்புகள் நம்மை வந்தடைய கௌரவ ஆலோசகர்களாக திரு.  நாஞ்சில் நாடன், திரு. வ.ஸ்ரீநிவாசன், திரு.ஆர்.ரவீந்திரன் (RAAC) செயல்படுகிறார்கள்.

ஒரு குடும்பம் புத்தகம் வாசிக்கும் பார்த்திருக்கிறோம். ஒரு குடும்பமே புத்தகத்திற்காக உழைத்து பார்த்திருப்போமா?!

அத்தகைய சிறந்த குடும்பம்தான் திரு. ஜி.ஆர். பிரகாஷ், ஒருங்கிணைப்பாளர் அவர்களின் குடும்பம்.

வாசகர்மையத்திற்காக அத்தனை சிறந்த பங்களிப்பு அவர்களுடையது.

நூல்கள் நாவல்கள், சிறுகதைகள்,கட்டுரைகள், என அனைத்து தரப்பு சிறந்த நூல்கள் நம்மை வந்தடையும். சிறுவாணி வாசகர் மையத்தின்   1,25,50,75, 100 நூலகளாக நாஞ்சில் நாடன் ஐயா அவர்கள் நூல்கள் வந்துள்ளன. 100வது நூலாக "சொல்லாழி"! 

பல அறிய வாசிக்க வந்த நூல்களில் குறிப்பிடத்தக்க சில நூல்கள் திரு. லாச.ராஅவர்களின் பூர்வா,இதழ்கள்,கழுகு,விளிம்பில்,கல்சிரிக்கிறது பிராயச்சித்தம்;

இந்திரா பார்த்த சாரதிஅவர்களின் 'வேர்ப்பற்று';'கல்குமிழிகள்' ந. பிச்சமூர்த்தி அவர்களின் சிறுகதைகள்; பெண் எழுத்தாளர் ராஜம் கிருண்ணன் அவர்களின் 'கதவிற்கு அப்பால்';

இவ்வருடம் கோவை புத்தகத் திருவிழாவில் சாதனையாளர் விருது பெற்ற பேராசிரியர் க.ரத்னம் ஐயாவின் 'கல்லும் மண்ணும்';

மற்றும் பல சிறுகதை நூல்கள் மற்றும் சிந்தனைத்தூண்டும் பல கட்டுரை நூல்கள்.

இந்தாண்டு ஏப்ரல் - செப்டம்பர் வரையில்:

சிட்டி (சிறுகதைகள்), நவரச நினைவுகள் சௌகார் ஜானகி, சொல்லாழி, காவிரிக்கரையில் திருவையாறு,என்றும் அன்புடன், வந்தே மாதரம் என்ற அற்புத நூல்கள் நம்மை வந்தடைந்து கொண்டிருக்கின்றன.

நூல்களின் முகப்புப் படங்கள் ஓவியர் ஜீவா அவர்களின் கை வண்ணம்.

நூல்கள் வந்துவிட்டன ..ஆனால் அதை இன்னும் வாசிக்க வில்லையெனில் அவரின் அட்டை பட ஓவியமே நம்மை வாசிக்க தூண்டி இழுக்கும்.

அச்சில் வராத ஆனால் வாசிக்க வேண்டிய பல அற்புத நூல்களை தேடித்தேடி பதிப்பித்து நம்மிடையே கொண்டு சேர்க்கும் அரிய உழைப்பு சிறுவாணி வாசகர் மையத்தினுடையது.

தேன் சுவை தமிழால் சிந்தனையைத்தூண்டி,

அரிய நூல்களால் உள்ளம் நிறைத்து,

இல்லம் தேடி வரும் 'சிறுவாணி வாசகர் மைய' நூல்களும், அவர்களின் உழைப்பும்  நிச்சயம் தமிழன்னையால் ஆசிர்வதிக்கப்பட்டவை.!

கோவை புத்தகத் திருவிழாவில் மட்டுமே பங்குபெறும் சிறுவாணி வாசகர் மையம், பவித்ரா பதிப்பகப் புத்தகங்களை வாங்கிடவும், வாசகர் மைய சந்தாதாரரர் ஆகிடவும்

சிறுவாணி வாசகர் மையம்/பவித்ரா பதிப்பகம்

கோவை புத்தகத் திருவிழா-2026

அரங்கு எண் 35

Jayasri venkatesan fb

--------------------

Let's enjoy this weekend!

 கோவையின் ஒரு Hidden Gem பற்றி இன்று பார்ப்போம். அதுவும்  ஜீலை 26 அன்றோடு அனுமதி முடிகின்றது!

 

புத்தகக் கண்காட்சி! அரங்கு A - ஸ்டால் 35

சிறுவாணி வாசகர் மையம் /பவித்ரா பதிப்பகம்

இவர்கள் தங்கள் வாசகர்மையம் மூலம் பல அரிய புத்தகங்களை வாசகர்களிடையே 10 ஆண்டுகளாக வெற்றிகரமாக வீட்டின் வரவேற்பு அறைக்கே கொண்டு சேர்க்கின்றார்கள்.

பல அரிய நூல்களான வேரும் விழுதும், நவம், உனது ஆத்ம பிரயத்னம்,போக்கிடம்,தக்கர் பாபா,விளிம்பில், பிஞ்ஞகன், கல்லும் மண்ணும், கம்பனும் சிவனும், காப்பிய இமயம் முதலிய பல அரிய நூல்கள்.

நாவல்கள் மட்டுமின்றி சிறுகதைகள், வாழ்க்கை வரலாறு,  கட்டுரைகள் நம்மிடையே கொண்டு சேர்க்கிறார்கள்.

அது சரி நாம் இந்த நூல்களை ஏன் படிக்க வேண்டும்?!

வாசிப்பு என்பது சிறு குழவியின் தீண்டலால்..போர் வீரனின் ஆயுத தாக்குதல் நம்முள் செய்யும், ஒரு புயலின் தாக்குதல் தென்றலாக வருடும்...மாயாஜாலமெல்லாம் நல் புத்தகங்கள் வாசிப்பில் நம்முள் நிகழும்.

 நம் மொழியின் சிறப்பை, வரலாற்றை, உண்மை சம்பவங்களை, கலாச்சாரத்தை பின் எப்படி அறிய முடியும்.

நூல்கள் வெறும் கற்பனையில் எழுதப்பட்டவை மட்டுமல்ல.  அவை உண்மையை தாங்கி காலம் கடந்து எடுத்துச் சொல்லும் காகித கல்வெட்டுகள்!

அதை காலம் கடந்தும் உயிர்ப்போடு வைக்க வாசகர்களால் மட்டுமே இயலும்!

மேலே குறிப்பிடப்பட்டவை அவற்றுள் மிக சில நூல்களே!  நம் இல்லம் தேடி  இத்தகை சிறந்த புத்தகங்கள் வருவதற்கு சிறுவாணி வாசகர் மைய சந்தாதாரர் ஆகவும், இன்னும் பல அரிய நூல்களை வாங்கவும்,

சிறுவாணி வாசகர் மையம்/பவித்ரா பதிப்பகம்

அரங்கு A - ஸ்டால் 35 கொடிசியா வர்த்தக வளாகம்

Let your weekend is fully "Booked"!!

Jayasri venkatesan

----------------------------